قصه من تاليف اختي

المشاركة الأصلية كتبت بواسطة الـفـهـد

يا سلام على القصه بس شكلها مطوله

عاد اختك تنفع تكون مؤلفة افلام ومسلسلات هههههه

يسلموو بنت مارب

تحياااتي لك

ايه
انــــــــــــاااهـ
قلت بعد جذي هاهاهاي
ايه باين انها عشرين جزء هاهاهاي

المشاركة الأصلية كتبت بواسطة دايم العزء

ياهوه ياعالم ياناس
وينك من زمان بنت مارب
لك كل الشكر

اشـــكـــركـ ع الــمــرور

الجزء الخامس

فهد وجاسم وناصر ونورة كانوا عند ام ناصر في المستشفى، وبعدين طلعوا وتمت نورة وياها ، وفهد رد الشركة ويوم وصل السكرتيرة ندى تناديه .
ندى : فهد أبو عبد الله بدو ياك .
فهد : خير شيبي هذا ؟
ندى : والله ما بعرف بس هو آل عاوزك ضروري ، وأكد انو اول ما تجي تروح لو عاطول .
فهد : الله يستر .
ويروح فهد مكتب بو عبد الله .
يطق الباب ويدش : خير بوعبد الله .
بو عبد الله : اقعد يا فهد .
بو عبد الله : طبعا تعرف ان ولدي عبد الله داوم اليوم وابي منك تعلمه الشغل .
فهد في نفسه : والله لأطفره .
بو عبد الله : ها شقلت .
فهد : حاضر على أمرك .
بو عبد الله : وهذا العشم يا فهد .

طلع فهد من عند بو عبد الله ، ويسأل السكرتيرة عن مكتب عبد الله ويروح له .

فهد يدش مكتب عبد الله : يا هلا بعبد الله أشوف الشركة اليوم منورة .
عبد الله قاعد عالمكتب وحتى ما قام ولا سلم : طبعا الشركة تنور بوجود أصحابها .
فهد : أنا فهد مدير المهندسين وأبوك قايلي اعلمك الشغل .
عبد الله بتكبر : مابي حد يعلمني ، أنا أعرف كل شي مب ياهل .
فهد : على راحتك بس لازم تبلغ أبوك هالكلام عشان ما يلومني .
عبد الله : لا تخاف مب لايمك .
فهد في نفسه : هذا على شنو شايف نفسه .

وطلع فهد من مكتب عبد الله .
السكرتيرة ندى تشوفه : استاذ فهد ام ناصر ليش ما داومت اليوم ؟

فهد : تعبانه شوي .
ندى : سلامتها شو عندها ؟
فهد : عندهاالضغط مرتفع .
ندى : أكيد الضغط بيرتفع ما دام ابو عبد الله رجع الشركة وجايب معو ابنو كمان .
فهد : الله يعينا عليهم .
وخلاها وراح مكتبه .

فهد يروح المكتب ويتصل على أبوه : الو يبه وينك ؟
ابو فهد : في البيت يعني وين ؟
فهد : يبه عمتي أسماء امس تعبت وهي الحين في المستشفى .
أبو فهد : شنو اسماء شفيها ؟ وليش ما علمتني ؟
فهد : يبه توني دريت .
أبو فهد : زين عطني المستشفى .
فهد قال حق ابوه اسم المستشفى وأبو فهد يروح مع ام فهد يشوفون ام ناصر .


وصلوا ام فهد وأبوو فهد المستشفى ويروحون صوب غرفة ام ناصر .
أبو فهد : الحمد لله عالسلامة يا ام ناصر ما تشوفين شر .
ام ناصر : الشر ما ييك يا بو فهد .
أم فهد : سلامتج يا ام ناصر ما تستاهلين .
أم ناصر : الله يسلمج يا ام فهد .
ابو فهد : من شنو صار لج جذي .
نورة : خالي مشاكل عندها ويا ويه النحس بو عبد الله .
أم فهد : الله يكفينا شره هذا ما يموت ويفكنا منه .
ام ناصر : شسوي قدري أجابل ويهه طول العمر .
أبو فهد : بيعي الشركة وافتكي من هالمشاكل .
أم فهد : اي والله يا ام ناصر أبو فهد عنده حق راحتج أهم شي .
نورة : نفس كلام ناصر يا خالي .
أم ناصر : لا ما اقدرانتوا م تعرفون الشركة شنو بالنسبة لي ، هذي كل حياتي لو راحت مني حياتي تروح معاها .
أم فهد وأبو فهد مستغربين من كلامها وما كانوا متوقعين انها متمسكة بالشركة لهالدرجة .

نورة : ليش يمه تقدرين تبيعين نصيبج ونصيبنا انا وناصر ما عندنا مانع .
وتقدرين تفتحين لج اي مشروع ثاني . وتفتكين من المشاكل مع بو عبد الله .
أم ناصر : ما اقدر انتوا ما تدرون شنو تعني لي الشركة ، اذا بعتها يعني اني ابيع حياتي وذكرياتي مع المرحوم بو ناصر الله يرحمه ما تدرون اني لما ادش المكتب احس انه موجود فيه احسه وياي .
نورة تأثرت من كلام أمها وشكلها شوي بتصيح .
ام فهد وأبو فهد لاحظوا التأثر على ام ناصر ونورة وأبو فهد حس انه غلط يوم فتح الموضوع.



بعد يومين طلعت ام ناصر من المستشفى والدكتور قال لها ما تعصب ولا اتعب نفسها وعطاها اجازة كم يوم .

الساعة سبع فليل يطق الباب .
كان يوسف ومعاه امه وأخته ليلى ، وجايبين معاهم ورد وشوكولاته وحركات .
نورة تسلم عليهم : يا هلا تفضلوا .
يسلمون على بعض ويدشون .
أم يوسف انبهرت من جمال نورة وفي نفسها : ما شاء الله عليها قمر .
ليلى بعد عجبها جمال نورة .
يوسف راح صوب مجلس الرجال ونورة راحت تنادي ناصر عشان يروح حق يوسف .

أم يوسف وليلى قاعدين ونورة قاعدة وياهم وبعد شوي أم ناصر تنزل وتقعد وياهم .

أم يوسف : الحمد لله عالسلامة يا ام ناصر ما تشوفين شر .
أم ناصر : الله يسلمج من الشر .
ليلى تكلم نورة : انتي نورة صح .
نورة : شلون عرفتي اسمي .
ليلى : يوسف دوم يكلمنا عنكم وقال لنا يوم طاحت امج وشلون كنتي خايفة عليها .
نورة : لا تذكرين يا 000000 شنو اسمج ؟
ليلى : اسمي ليلى .
نورة : عاشت الاسامي وايد حلو اسمج .
ليلى : انتي الحلوة .
ام يوسف : اي والله ما شاء الله عليها عيني عليها باردة .
ليلى : انتي اي صف نورة .
نورة : بروح ثالث ثانوي . وانتي .
ليلى : انا في الجامعة سنة ثانية .
أم ناصر : ما شاء الله الله يوفقج .
ليلى كانت وايد حبوبة واجتماعية ، وبسرعة نورة خذت عليها .
نورة : ليلى تعالي معاي نروح غرفتي .
وراحوا ليلى ونورة .

أم ناصر : ما شاء الله عليها ليلى حبوبة بسرعة تنحب .
أم يوسف : الله يسلمج من طيبج والله .


ناصر ويوسف في المجلس .
يوسف : اصدق ناصران ما ودي ارد كندا .
ناصر : بل ليش حرام ما باقي لك شي وتخلص
يوسف : احس اني زهقت ومليت .
ناصر : وشلون كنت قاعد قبل خمس سنين .
يوسف : اول غير والحين غير .
ناصر : انت اليوم مب طبيعي وتكلمني بالالغاز .
يوسف : بعدين تعرف كل شي .



الساعة تسع راحوا يوسف وامه واخته .
وهم في السيارة
يوسف : ها شرايكم فيهم .
أم يوسف : ما شاء الله وايد طيبين ، أم ناصر يحليلها ما في منها ، والا بنتها نورة ما شاء الله عليها .
ليلى : اي والله يمه يا بخت اللي بياخذها .
يوسف استانس لأن أمه وأخته حبوهم وهذي أول خطوة خطط لها نجحت .




اليوم الثاني

أم ناصر صحت من الصبح وراحت الشركة ما قدرت تقعد في البيت وقطعت الاجازة المرضية .

ويوم وصلت لقت مكتبها مصكر والسكرتيرة مب موجودة وعلى طول راحت مكتب فهد

فهد : هلا هلا عمتي .
أم ناصر : من مصكر مكتبي ؟ وين ندى ؟
فهد مو عارف شيقول وما يبي يضايق عمته .
أم ناصر : فهد تكلم لا تنزفزني .
فهد : مدري شقولج بس بو عبد الله صكر المكتب وخذ ندى حطها سكرتيرة حق ولده عبد الله .
أم ناصر عصبت : ومن سمح له هاه ، على كيفه يتصرف وكأن الشركة له بروحه .
فهد : هدي يا عمتي هدي الزعل مب زين لج .
أم ناصر : طلعت وهي معصبة وعلى طول راحت مكتب بو عبد الله وفهد لحق وراها .

أم ناصر ادش مكتب بو عبد الله من غير استئذان .
أم ناصر : ومنو اللي سمح لك تتصرف في الشركة على كيفك ، انت لك نصيبك ومكتبك وبس وما لك خص بمكتبي ولا سكرتيرتي فاهم .

ابو عبد الله واللي كان معاه ولده عبد الله : انتي من سمح لج ادشين من غير استئذان .
ام ناصر : والله اللي ما يحترم نفسه محد يحترمه ، انت سويت اللي سويته بدون استئذان وشلون تبيني استأذن وانت ما تحترم حد .
عبد الله يتدخل : هي انتي ، احترمي نفسج وتكلمي عدل .
فهد : انت اللي احترم نفسك .
وصارت مشكلة كبيرة والموظفين التموا وتدخلوا وبعدين بو عبد الله عطاهم مفتاح المكتب ورجع السكرتيرة حق ام ناصر .

أبو عبد الله في مكتبه مع ولدة عبد الله .
أبو عبد الله : آخ يالقهر محد قاهرني غير هالملسونة .
عبد الله : خلها تولي ما عليك منها ، أنا بادبها لك .
بو عبد الله : شبتسوي يعني ؟
عبد الله : بتشوف يبه إن كان ما خليتها تبيع نصيبها ولا بعد هي اللي بتعرض علينا نشتري.

بو عبد الله :زين يبه بس لازم تقول لي على كل شي .
عبد الله : ولا يهمك يبه خطوة خطوة .

وتموا بو عبد الله وعبد الله يخططون عشان يستولون عالشركة .


أم ناصر في مكتبها وفهد وياها يهديها .
فهد : عمتي اهدي صحتج ما في شي يستاهل .
ام ناصر : تعبت يا فهد تعبت ، بو عبد الله مو راضي يخليني بحالي .
فهد : ما عليج منه هذا واحد جبان ولا يهمج فيه .
أم ناصر : فهد شرايك ادير نصيبي في الشركة انا خلاص تعبت أبي ارتاح من المشاكل .
فهد : عمتي هذي مسؤولية كبيرة وما اقدر اتحملها .
أم ناصر : أنا بسوي لك توكيل ، وانت ما شاء الله عليك فاهم الشغل عدل .
فهد : عمتي بفكر في الموضوع عطيني فرصة
أم ناصر : فكر زين يا فهد .





في بيت بو مبارك .
ام مبارك قاعدة مع ابو مبارك ويدش عليهم يوسف .
يوسف: السلام عليكم.
ابو مبارك وام مبارك : وعليكم السلام .
يوسف يقعد : يمه يبه بغيتكم في موضوع .
أبو مبارك : خير يبه شفيك .
يوسف : يبه بغيت أخطب .
أم مبارك : زين يا ولدي وتبيني أدور لك عروس .
يوسف : لا يمه العروس موجودة وتعرفينها .
أبو مبارك : منهي يا ولدي ؟
يوسف : نورة أخت ناصر رفيجي .
أم مبارك استانست : يا زين ما اخترت يا ولدي .
أبو مبارك : يعني طابخينها سوا ، وأنا آخر من يعلم .
يوسف: انت الخير والبركة يبه وما بيتم شي من غير رضاك .
أبومبارك : وإذا قلت لكم اني مب موافق .
يوسف منصدم : لا يبه الله يخليك تكفى .
أبو مبارك يمثل عليهم : لا لا ما يصير ، ما تعلموني مب راضي .
يوسف يقوم ويحب راس ابوه : يبه تكفى .
أم مبارك : أبوك يتغشمر معاك لا تصدقه.
ابو مبارك : ما دام شايفين انها زينة خلص توكلوا على الله .
يوسف يحب راس ابوه مرة ثانية: مشكور يا أحلى أبو في الدنيا .
أم مبارك : تحب راس ابوك وانا لا ، عيل مب موافقة .
يوسف : لا يمة تكفين ، ماصدقت أبوي يرضى .
ويروح يحب راس امه
يوسف : كله ولا زعل أم مبارك .
أم مبارك وأبو مبارك : ههههههههههه
يدش عليهم مبارك : ها شعندكم ضحكونا وياكم .
يوسف : مب قايلك سر .
أبو مبارك : لا سر ولا شي أنا بقولك .
يوسف يقطعه : لا يبه لا تقول اخاف يزعل .
ام مبارك : وليش يزعل ما في شي يزعل .
يوسف : تبون تقولون له انا كنا نحش فيه .
مبارك تغير وجهه : شنو ؟ تحشون فيني ما عليه .
أبو مبارك يضحك ويطالع يوسف : الله يهداك يا يوسف ليش تقول له .
مبارك : الله يسامحكم حشوا على كيفكم .
أم مبارك : لا يا وليدي لا تصدقهم ما كنا نحش فيك ولا شي .
يوسف : لا امبلا كانوا يقولون عنك انك بتعنس صار عمرك 26 سنة وللحين ما عرست .
ابو مبارك : هههههه يوسف يتغمشر وياك يا مبارك لا تصدقه .
مبارك : ومن متى هذا يتغشمر ؟ كل حياته جد بجد .
أم مبارك : لا بس من الحين راح يتغشمر على طول ، ويصير دمه خفيف .
مبارك : وشنو المناسبة يا خفيف الدم .
أبو مبارك : العروس بتخلي دمه خفيف .
مبارك : اي عروس ؟ شكلكم اليوم مب طبيعي ، فيكم شي .
أم مبارك : أخوك يا مبارك يبي يخطب .
مبارك : ايه قول جذي وأنا أقول شنو خفة الدم الل نزلت عليه مرة وحدة ، لو ندري كان من زمان خطبنا لك .
يوسف : يعني شنو ؟ أنا دمي ثقيل ويا ويهك .
ويلحق ورا أخوه يبي يطقه ومبارك يشرد .
وأبو مبارك وأم مبارك ميتين ضحك عليهم .
أبو مبارك : الله يديم السعادة علينا
أم مبارك : آمين .

بصررراحه روووعه ابداع

يعطيك الف عافيه خيتوو

سلامي للمولفه الرائعه

المشاركة الأصلية كتبت بواسطة بسمه

بصررراحه روووعه ابداع

يعطيك الف عافيه خيتوو

سلامي للمولفه الرائعه

الله يعافيج
يوصل سلامج

ما شاء الله شكلها القصه مطوله صارت مسلسل تركي ههههههه بس للامانه ممتعه

يسلمووو خيتو بنت مارب

ننتظر بقية القصه بشوووق

تحيااااااتي لك

الجزء السادس

في بيت بو فهد

فهد يكلم أبوه : يبه متى بتروح معاي ..
أبو فهد : وين يبه ؟
فهد : بيت عمتي يبه عشان نخطب نورة .
ابو فهد : خلص جهز نفسك اليوم .
فهد مستانس : صج يبه .
ابو فهد : عيل اتغشمر وياك ، بكلم امك اليوم وبنروح معاك .


المغرب
كان فهد وأبوه وأمه جاهزين ، واتصل فهد على عمته وقال انهم بيروحون لهم .
ام ناصر ونورة كانوا يستعدون لاستقبالهم ونورة كالعادة مجهزة كل شي حق الضيوف .

فهد وأبوه راحوا صوب المجلس ، وأم فهد دشت صوب الحريم .

أم ناصر : حي الله ام فهد شلونج .
أم فهد : الله يسلمج بخير . وشلونج الحين ان شاء الله احسن .
أم ناصر : الحمد لله على كل حال .
نورة ادش ومعاها العصيروتحطه وبعدين تسلم على أم فهد .
ام فهد : شلونج نورة .
نورة : بخير خالتي انتي شخبارج ؟
ام فهد : بخير الله يسلمج ، وشلون الدراسة وياج ؟
نورة : الحمد لله خلصت امتحانات والحين انطر النتيجة .
أم فهد : الله يوفقج يمه .
أم ناصر تعطي العصير حق أم فهد : تفضلي يا ام فهد .
أم فهد تاخذ العصير : تسلمين .






أبوو فهد وفهد في المجلس مع ناصر .
أبو فهد : ناصر يا ولدي احنا اليوم جايينكم في موضوع .
ناصر : خير خالي آمر .
أبو فهد : ودنا اختك نورة حق ولدي فهد .
ناصر :والله ياخالي ما تغلى عليكم ، بس لازم أكلم الوالدة ونورة وبعدين ارد عليكم .
ابو فهد : أكيد يا ولدي لازم .
ادش عليهم ام ناصر وتسلم على أخوها وفهد .

أبو فهد : قعدي يا اسماء بغيناج في موضوع .
أم ناصر : خير يا بو فهد .
ابو فهد : احنا اليوم جايين نخطب نورة حق فهد .
أم ناصر استانست لانها تحب فهد وايد وتعتبره ولدها الثاني وتعتمد عليه في كل شي .
أم ناصر : أظن ما بلقى حق نورة أحسن من فهد .
فهد استانس من كلام عمته : مشكورة يا عمتي وهذا العشم .
ناصر : بس يمه نورة توها صغيرة عالزواج حتى ما خلصت الثانوية .
فهد يتدخل : الموضوع بيكون خطبة وبس وأنا مستعد أنطرها لين تخلص .
ناصر : بس في فرق بالعمر كبير عشر سنوات .

أبو فهد : وش فيها يعني أمك تزوجت صغيرة وكان الفرق بينها وبين أبوك 15 سنة
ناصر : وهذا هو راح وخلاها تعاني بروحها .
ابو فهد : اذا انت رافض قول واحنا ما بناخذها غصب .
أم ناصر : لا يا خوي لا ناصر ما يقصد ، وإذا علي أنا موافقة والرأي الأول والأخير رأي نورة .
ناصر : على راحتج يمه انا ما لي شغل .
أم ناصر : أنا بكلم نورة ويصير خير ان شاء الله ، عطونا مهلة وبنرد عليكم .
أبو فهد : هذا الكلام العدل مو كلامك يا ناصر .
ناصر : انا قلت لكم ما لي شغل .








نورة وأم فهد في الصالة .
أم فهد اطالع نورة : يمه انتي ليش وايد ضعيفة .
نورة : أحسن هاي الموضة الحين .
أم فهد : وش موضته اللي أعرفه الموضة بالملابس والمكياج والمجوهرات مو بالضعف .
نورة : الجسم الرشيق هو الموضة الحين .
أم فهد تلوي بوزها : عشنا وشفنا ( شغل الحموات ابتدى ههههههه )

ادش عليهم اسماء .
جاسم كان جاي من برى ويشوفهم قاعدين في المجلس ويروح لهم .
جاسم : ما شاء الله اشوف العيلة اليوم مجتمعة .
ويسلم على أخوه وولد أخوه ويقعد .
أبو فهد : اليوم مجتمعين وان شاء الله كل يوم .ومن اليوم ما راح نفترق ابد .
جاسم : آمين ، بس شكلكم في شي ، شعندكم ؟
أبو فهد : احنا اليوم جايين نخطب نورة حق فهد .
جاسم يطالع فهد ومستانس : لا والله ما شاء الله ، الله يتمم بخير.
ناصر ساكت وما علق .
وفهد استانس لأنه لقى تأييد من عمة وعمته .

وبعد ما راحوا أبو فهد وأم فهد وفهد .
ناصر وجاسم وأم ناصر ونورة قاعدين .
أم ناصر : نورة تدرين ليش بيت خالج زارونا اليوم ؟
نورة : عادي يمه كله يون عندنا .
أم ناصر : لا المرة هذي غير .
نورة مستغربة : وليش غير ؟
ناصر يضحك : جايين يخطبون .
نورة : يخطبون منو ؟
جاسم : يخطبوني أنا ، يخطبون من يعني ؟
أم ناصر : اسكت يا جاسم الله يخليك خلني اتكلم .
جاسم يضحك ويحط يده على حلجه يعني مب متكلم .
أم ناصر : اخطبوج حق فهد .
نورة متفاجأة : يمه توني صغيرو وما أفكر بالزواج . بكمل دراستي .
ناصر : ايه عدل كملي دراستج أحسن .
جاسم : انت شفيك يا ناصر ؟ ليش ما تبي فهد ؟ فهد ما عليه كلام .
ناصر : وانا ما قلت شي بس ابي مصلحة أختي .
أم ناصر : ومصلحتا مع فهد انا اكثر وحدة اعرف مصلحة بنتي ، فهد ريال وما عليه كلام ، وهو انسب واحد حق اختك .
ناصر : انا مومعترض على فهد ، انا معترض عالفكرة نفسها نورة توها صغيرة .
جاسم : ومن قالك بيتم الزواج بكرة . أكيد فهد بينطر نورة .
نورة : يمه انا ابي اكمل دراستي وبعدين يصير خير .
أم ناصر : فكري يا بنتي واستخيري ما تدرين وين الخير .
جاسم : وفهد ولد خالج وأكيد بيدير باله عليج .
نورة : خلص بفكر في الموضوع . ( بس في نفسها ما كانت مقتنعة )

وراحت على غرفتها وهي مضايقة وبعدين اتصلت على رفيجتها جواهر .

نورة :ألو جواهر .
جواهر : هلا نورة شلونج .
نورة وصوتها متغير : جواهر تقدرين تمريني .
جواهر اطالع الساعة : الحين .
نورة : ايه ابيج ضروري .
جواهر : زين بكلم أمي وبشوف .
نورة : زين انطرج لازم اشوفج .
جواهر : اوكي بكلم امي وجايتج .
جواهر راحت استأذنت من امها وبعدين راحت حق نورة .
وصلت جواهر وهي رايحة حق نورة غرفتها وتشوف جاسم كان نازل من الدرج .
جاسم يشوفها : انتي رفيجة نورة صح .
جواهر تذكرت الموقف اللي صار قبل مدة : ايه رفيجتها .
جاسم : اسمج جواهر صح .
جواهر مستغربة شلون عرف اسمها وفي نفسها : أكيد هذي نوروه ما عليه اراويها .
جواهر : عن اذنك بروح حق نورة .
جاسم انعجب فيها اكثروانها ما عطته مجال يكلمها وتم يطالعها لين راحت .
جواهر دشت غرفة نورة : شفيج نورة خرعتيني .
نورة : فهد يا جواهر فهد .
جواهر : منو فهد هذا يا نورة ؟
نورة : فهد هذا ولد خالي وأمي تحبه وايد وتثق فيه ، يشتغل وياها في الشركة وتعتمد عليه وايد .
جواهر : وش فيها يعني ؟
نورة : تقدم لي وخطبني .
جواهر تتنفس : وأنا عبالي شي خطير صاير .
نورة : المشكلة اني اعتبره مثل اخوي وعمري ما فكرت فيه .
جواهر : زين الزواج مو غصب قولي انج ما تبين .
نورة : بس اخاف امي وخالي جاسم يزعلون لأنهم وايد يحبونه .
جواهر : وليش مكبره الموضوع ، ما في شي غصب وما اظن أمج أو خالج يغصبونج .
نورة : مدري يا جواهر خايفة أحس انهم يزعلون لو ما وافقت .
جواهر : لا ما أظن أمج حنونة وقلبها طيب وخالج انا ما اعرفه بس هو ما له سلطة عليج .
نورة : مدري والله محتارة يا جواهر .
جواهر : قولي رايج بصراحة ولا تخافين من شي ، هذي حياتج ومستقبلج ،
الموضوع بسيط وانتي مكبرة السالفة فكري بكلامي عدل يانورة وخلي قراراتج حاسمة ،
وشي ما تبينه لا تترددين في رفضه .
وبعدين جواهر استأذنت لأنها قالت حق امها ما بطول .ونورة تمت تفكر بكلام جواهر .

والله شكلها مو موافقه ع فهد شكلها بتوافق على يوسف صح هههههههه اسبق الاحداث

منتظرين القادم

قصة رائعه

بأحداثها وتسلسلها وشخصياتها
يعطيك العافيه

في إنتظار بقية الأحداث
مشكوره يالغلا
ومنورة القسم فديتك

ابدااع والله يعطيك العافيه
متابعييييين
ودي