قصه من تاليف اختي

بسم الله الرحمن الرحيم

السلام عليكم ورحمة الله وبركاته

اليوم جبت لكم قصة جديدة من تأليف اختي واتمنى تحوز على اعجابكم

واتمنى أشوف تفاعل من الأعضاء


ما راح انزل الاجزاء ورا بعض

كل يوم او يومين جزء عشان تتشوقون للقصة

وابي اشوف تفاعل وردود حلوة




الجزء الأول

نتعرف في البداية على بطلة قصتنا وهي سيدة أعمال ناجحة اسمها ( أسماء ) عندها شركة مقاولات كبيرة أسماء بطلتنا تتميز بالذكاء وقدرتها على تحمل المسؤولية وبعد وفاة زوجها قدرت توقف الشركة على ريولها وقدرت تنقذ الشركة من الأفلاس بالرغم من المشاكل اللي واجهتها مع شريك زوجها ( بو عبد الله ) .
بعد ما توفى زوج اسماء أبو عبد الله سوى لها الكثير من المشاكل بس بذكاءها قدرت تتغلب عل كل المشاكل وخذته بالسياسة ، وقدرت تكسبه بعد ما كان رافض ان حرمه تشاركة بالشركة على قولته وكان يبي الشركة له بروحه وعرض عليها تبيع نصيبها في الشركة .
بس رفضت عرضه وقام يضايقها ويفتعل المشاكل ، ولما شاف ما في فايدة عرض عليها الزواج ، بس طبعا رفضت عرضه لأنها كانت تعرف نواياه وهدفه من ورا هالزواج عشان يستولي عالشركة .
ولما كثرت المشاكل بينهم تنازلت له عن جزء من نصيبها بالشركة ، وبالفعل قلت المشاكل بينهم على الرغم من عصبيته وتهوره في بعض الأحيان وعدم الأخذ برأيها
في كثير من الأمور المتعلقة بالشركة .
وبالرغم من المشاكل اللي واجهتها ما اهملت تربية اولادها وهم : ناصر اللي خلص الثانوية بتفوق وسافر كندا عشان يدرس الطب وصار له سنتين يدرس .
ونورة في ثاني ثانوي متفوقة في دراستها وعلى جمال وخلق ما شاء الله عليها .

في بيت أم ناصر

صحت الصبح وشافت الساعة قامت بسرعة تلبس عشان تلحق عالدوام ، راحت لنورة وطقت الباب .
أسماء : يلا نورة تأخرنا بسرعة عشان اوصلج بطريقي .
نورة : زين يمه جاهزة ثواني .
طلعت نورة من غرفتها وتبوس أمها وتحظنها .
نورة : صباح الخير يا أحلى أم بالدنيا .
أسماء : صباح الخير يا أحلى نورة .

نورة كانت تحب أمها ومتعلقة فيها وايد لنها ضحت عشانهم وايد وكانت الأم والأب في نفس الوقت ويوم توفى زوجها قبل عشر سنين كانت صغيرة 30 سنة وما رضت تتزوج عشان تربي عيالها وعاشت على ذكرى زوجها اللي كانت تحبه .

نزلت نورة وأمها وتريقوا وبعدين وصلت أسماء نورة المدرسة وراحت الشركة .
كان جاسم أخو أسماء عايش معاها في بيتها جاسم أصغر من أسماء بسنتين 38 سنة
كان متزوج وتوفت زوجته في حادث بعد زواجهم بسنتين بس وكانت حامل ، الصصدمة كانت شديدة عليه وأصيب بحالة نفسية صعبة ، فقررت أسماء انها تاخذة يعيش معاها عشان تخفف عنه وينسى اللي صار .
بس حياته كانت معتفسة عالآخر سهر لين الفجر وما يقوم الا الظهر ، وأسماء تعبت معاه ونصحته وايد بس ما فاد معاه وقالت بتخليه يمكن ينسى همومه .
أسماء كان عندها أخ ثاني اللي هو( سعد ) 50 سنه اكبرهم
سعد أخذ تقاعد من خمس سنين لأنه أصيب بطلق ناري في رجله أثناء التدريب
وكان يعرج شوي ، زوجة سعد( عائشة ) في عمر أسماء ، بنته الكبيرة فاطمة 28 سنة متزوجة وعندها بنت .
ولده ( فهد ) 27 سنة مهندس يشتغل مع عمته اسماء في الشركة وذراعها اليمين وكان يحب عمته ويحترمها .

( وقت الظهر )
طلعت أسماء من السركة وشافت فهد واقف عند سياته وراحت له .
أسماء : شفيك فهد ليش واقف في الحر .
فهد : السيارة عمتي مو راضية تشتغل .
أسماء : ههههههه أكيد مثل عوايدها كم مرة قايلتلك اشتري سيارة جديدة أحسن لك .
\فهد : هذي غالية ولها ذكرى عزيزة هدية أبوي يوم تخرجت من الثانوية ، صار لها عشر سنين وياي عمر يا عمتي عمر .
أسماء : هههههه خلها تولي وإذا عزيزة عليك حطها في المتحف وخذ وحده يديدة .
فهد : الظاهر ما في غير هالحل .
أسماء : يلا خلها هني وتعال بوصلك .
فهد : بس عمتي ما بي أتعبج .
أسماء: ما في تعب أنت اللي راح تتعب لني بروح مدرسة نورة أول وبعدين بوصلك .
فهد : خلص شورج وهداية الله .
فهد من زمان ما شاف نورة تقريبا خمس سنوات يوم كان عنرها 12 سنة والحين تغيرت وايد عن أول .
ركبوا السيارة وراحت أسماء صوب مدرسة نورة.
نورة تشوف سيارة أمها ومستغربة : منوهذا اللي ويا أمي غريبة .
راحت نورة وركبت السيارة وقعدت ورا .
وطالع امها من المنظرة .
أسماء فهمت : هذا ولد خلج فهد ما عرفتيه ؟
نورة : شلونك فهد .
فهد منحرج شوي : الحمد لله انتي شلونج .
نورة : الحمد لله .
فهد : اصدقين ما عرفتج كبرتي وتغيرتي أخبرج ياهل .
أسماء : السنين تمر بسرعة يا فهد والياهل يكبر .
فهد : اي والله يا عمتي صدقتي .
فهد في نفسة : ما شاء الله شلون تغيرت واحلوت .
نورة كانت ماخذة بياض أمها وشعرها الناعم وماخذة من أبوها عيونه الوسيعة ،
كانت طويلة .
أسماء ها فهد شرايك تروح معانا البيت تتغدى زمان ما مريتنا .
فهد : لا عمتي اعذريني اكيد أمي وأبوي ينطروني عالغدا .
أسماء : أتصل لهم وقولهم ترى عمك جاسم يسأل عنك اقعد معاه يبي يسولف معاك .
فهد : خلص عمتي بتصل لهم .
فهد اتصل على أمه وخبرها انهمعزوم عند عمته .
وصلوا وفهد دش الميلس ، ونورة راحت غرفتها بدلت ملابسها وبعدين راحت المطبخ تساعد أمها في تحضير الأكل .
كان عندهم طباخ في المطبخ الخارجي بس كانوا يشرفون على تحضير السفرة .

جهزوا الغدا ورتبوا كل شي وراحت أسماء تصحي أخوها جاسم .

وبعدين نزلت وراحت حق فهد .
أسماء : يلا فهد الغدا جاهز .
فهد وين الحمام بغسل يدي .
أسماء تأشر حق فهد عالحمام اللي كان قريب المطبخ وتروح ترتب الأكل
فهد غلط بدال ما يدش الحمام دش المطبخ واللي كانت نورة هناك مع الخدامة تجهز العصير وما كانت منتبهه لوجود فهد اللي رد على ورا بسرعة وفي نفسة ما شاء الله البنات بسرعة يكبرون ونورة طبعا ما كانت لابسة شيلة وشعرها الناعم كان طايح على كتوفها .
ومع بياضها كانت طالة جنان .
فهد يغسل يده في الحمام وسرحان وفجأة يسمع حس حد وراه ويلتفت الا عمه جاسم .
جاسم : اشفيك فهد اللي ماخذ عقلك .
فهد : ها لا عمي ولا شي شلونك . \
جاسم : الحمد لله بخير .

ويسمعون صوت أسماء تناديهم : يلا سنة تغسلون الأكل برد .

راحوا جاسم وفهد وقعدوا عالسفرة .
نورة جاية وشايلة صينية مكرونة وتحطها عالطاولة .
جاسم : يلا كأن هالأكل هذا كله ما يكفي .
نورة : عمي تدري اني ما احب العيش .
جاسم : اي كله من امج مدلعتج وكل أكلج ايطالي .
أسماء : جاسم شفيك على بنتي خلها براحتها .
جاسم : اي دلعيها بعد .
أسماء : جاسم الله يهديك تنتقد الناس وما تبي حد ينتقدك وانت كله سهر ونوم للظهر .
فهد : خلص شفيكم بتقلبونها نكد الحين .
أسماء : أنا خايفة عليه وعلة صحته .
جاسم : شبي بصحتي دام كل شي راح خلها الثانية تروح مع اللي راحوا .
أسماء : ليش يا خوي توك صغير والعمر قدامك ، خل أيمانك بالله قوي وان شاء الله بيعوضك خير .
نورة : خلص يمه ما ينفع الكلام لا تعبين عمرج خل ناكل ابرك .
أسماء : اي والله صاجة يا بنتي الكلام معاه ضايع .
وتموا ياكلون وكل شوي فهد يطالع نورة .
جاسم لاحظ نظرات فهد لنورة : أحم أحم كح كح .
أسماء : شفيك تبي ماي .
تقوم نورة تصب له ماي .
ياخذ جاسم الماي من يد نورة ويشربه ويطالع فهد اللي فهم معنى نظراته وانحرج وتم ياكل .
خلصوا الغدا وراح جاسم وفهد الميلس وهم قاعدين يسولفون دشت عليهم أسماء وبيدها القهوة ونورة وراها شايلة صينية صغيرة .
جاسم يعلق : بعد لاحقينا بالأكل لين هني .
نورة : هذا سويت خالي مو أكل .
جاسم : بعد ! لا بالله متنا من التخمة .
نورة : خالي هذا لازم كلكم تاكلونه لأني مسويته بيدي .
فهد : دام نورة مسويته أكيد بناكل .
أسماء تصب القهوة ونورة تحط الحلو بصحون صغيرة وتعطيهم .
جاسم خلص على صحنه وفهد يطالعه .
فهد : هذا اللي ما يبي ياكل .
جاسم : شسوي ما اقدر أقاوم حلويات نورة ، كل يوم تطلع لنا بشي يديد .
أسماء : نورة وايد شاطرة بالحلويات علمتها وبعدين تفوقت علي .
نورة : أنا مومعتمدة عليج بس أنا عندي مصادري الخاصة بالطبخ .
فهد يسمع وهو مستانس على كلامها .
جاسم : وشني مصادرج يا عبقرية زمانج ؟
نورة : مصادري وايد مثل الانترنت وكتب الطبخ وساعات أكلم طباخنا عالانتركم ويعلمني بعض الشغلات .
فهد : ايه تكلمين الطباخ يعني ؟ وأهلج يدرون ؟
جاسم وأسماء : ههههههههه
نورة انحرجت منه وفي نفسها : شفيه هذا ؟
بعد شوي فهد يطالع ساعته : وايد تأخرت بيأذن العصر .
جاسم : خلك من زمان ما شفناك بنروح نصلي العصر مع بعض وبعدين نطلع شوي .
أسماء استانست :اي والله روح مع عمك وطلعوا مع بعض .
فهد فهم أن عمته تبيه يروح مع عمه يطلون ويطلع من الجو اللي عايش فيه .

صلوا العصر وبعدين طلعوا يتمشون .
جاسم : ها فهد للحين ما لقيت العروس المناسبة ؟
فهد : لا والله عمي ، أمي تقولي تعال بخطب لك في بنت مثل القمر ولما أروح أتفاجأ انها لا قمر ولا شي .
جاسم : انت اللي ما يعجبك شي ولو تبي الزواج كان عرست من زمان .
فهد : حتى فطوم تقول نفس الكلام .
جاسم : الا شخبارها فاطمة من زمان عنها .
فهد : لاهيه فشغلها ووبنتها ، الله يعينها حتى احنا ما نشوفها .
جاسم : هذي حال الدنيا العيال يكبرون ويتزوجون وينسون أهلهم .
فهد : الا أنا لما أـزوج بعيش مع اهلي .
جاسم : ايه بنشوف .
جاسم : شرايك بنورة ؟
فهد : ها شفيها نورة .
جاسم : أنا أشوف انها مناسبة لك .
فهد ايه بس في فرق بالعمر .
جاسم : مو وايد عشر سنين بس .
فهد : عشر سنين مب شوي يا عمي .
جاسم : مرتي الله يرحمها كانت صغيرة ويوم صار الحادث كان عمرها 23 سنة .
فهد : الله يرحمها وكان يبي يغير الموضوع لأنه لاحظ الضيق على وجه عمه .
فهد : خلص اخطب لي ياها مو انت عمي .
جاسم : من صجك عاد ؟
فهد : ايه كلم عمتي ومهد لي الموضوع .
جاسم : الحين كل البنات اللي شفتهم ورحت تخطبهم محد عجبك فيهم ونور هي اللي عجبتك ؟
فهد : الصراحة يا عمي ما خبي عليك ، نورة أول ما شفتها حسيت باحساس غريب صوبها وهي اللي قدرت تحرك مشاعري .
جاسم : احم احم وأخيرا الصنارة غمزت .
فهد : وصادت أحلى جوهرة .
جاسم : عيني يا عيني مساكين أهل الهوى .

جاسم وصل فهد البيت .
فهد : عمي دش أبوي يبي يشوفك .
جاسم : مرة ثانية يا فهد تعبت اليوم بروح ارتاح .
فهد : على راحتك عمي يلا مع السلامة .
جاسم : مع السلامة .

جاسم رجع البيت وتم في الصالة يطالع التلفزيون وبعدين راح غرفته .

وهو رايح صوب غرفته سمع صوت نورة تضحك بروحها ، شك انها ممكن تكلم حد في التلفون وراح صوب غرفتها وفتح الباب بقوة .
ويوم شاف المنظر انصدم .

يا ترى شنو شاف جاسم ؟ ونورة شكانت تسوي ؟ ومع منو كانت تضحك ؟

تابعوا معي أحداثا جديدة