(وجه الحق)

من لا يقول الحق في وجه ظالم
ظلمت وجه الحق لا انعد رجّال
واللي بِقَول الحق تلقاه والم
رجَال لكن حق عن عشرة ارجال
الحر سيف لشفرة الظلم ثالم
عونٍ معَ العدل وعلى الظلم سلاّل
واللي يتاجر في هموم المظالم
برماح دعوات المظاليم ينطال
ومن لا يجيب العلم من راس عالم
قهواه من دلّة هل الجهل فنجال
لا يفتكر بانّه من الجهْل سالم
ساحب ذيول الجهْل من روس جهّال
والغدْر لقلوب المشاكيل كالم
والجرح كنّه غيم بالغبن همّال
الشهْم ويّا الغدْر ما ينْتوالم
إلاّ إذا أَمّ المصلّين تمثال
لو ما انغدر بكليب ماثار سالم
ولا ينكتب بالدم لا اتصالح انذال
واللي على العيلات دايم مسالم
داس السّطر وانداس باقدام عيّال
يسامح بثنتين شيمه واذا لم
يبين فضله فيهم ايثور ريبال
والطيب طود اسمه فريد المعالم
فى عيون هامات المراجل له اجلال
واللي من دون افعال يرقاه حالم
لازم فعول اصدق من افعول زلزال
فعايلن من كل عيبن سوالم
ماكنّها الا ديمه امطارها انفال
منها الصحارى الجدب تحيا عوالم
وارمالها تلبس من الخير سربال
حينه يكون الطّيب شكْل السلالم
يرقى بفعله فوق راسه ويختال
ورجلٍ من دون افعال للنفس ظالم
ولطمت وجه الحق لا قلت رجال

الله الله ابدااع وطرح رائع وجميل

كما تعودنا عليه

رااق لي مانثرت هنا بقووه

كنت هنا وسجلت اجمل اعجااب

اخي عقيد الخيل انت ذوق