الصداقة

صداقة الاشراف تبنى على الطيب
بين الرجال اللي تعرف المعاني
صداقة كرام اللحى والاشانيب
اهل الفعول الطيبات السماني
قروم مثل وصف الحرار المراقيب
وهقواتهم تبني كبار المباني
صداقة ماحافها النقد والعيب
ولاحافها الملهود ولد الهداني
صحبة رجال يكدرون المشاريب
لاخانوا الرديان والوقت شاني
رجالهم يقدم كما الزير وكليب
ويشفيك لاجارت صدوف الزماني
ووقت القسا تلقا رجال ومعازيب
حجاج يضحك والشحم في الصواني
صديق صدق(ن) في نهار الاصاعيب
صادق معي واذا بغيته وزاني
وانا اكتفي بصحبة رجال المواجيب
واعدهم في الضيق حسبة اخواني
ولاحدهم في الوقت جور ومصاعيب
واحتاجوا الفزعات صدق(ن) بياني
افزع وانا شوق البني الرعابيب
وازيح كربة صاحبي لانخاني
هذي الصداقه وغيرها يلحقه ريب
صداقة اللي قصدهم شي ثاني
يضحك وهو قصده بشذب العراقيب
ويدور الغرات قاصي وداني
ويركب الكذبه على الكيف تركيب
والزور والبهتان عنده الاماني
ويبهت اصحابه بالردى والاكاذيب
ويقول علم ياجماعه لفاني
هذا ترى ودك تمسه مشاعيب
حتى يموت ومابهت مودماني
منبوذ في الدنيا عسى حظه يخيب
ولاله مع الاجواد قدر ومكاني
وفي الآخره يبشر بنار ولواهيب
مصيره الزقوم والحيل واني
تمت وتم القاف قلته بترتيب
واللي سمع يقول يسلم لساني
لكم تحياتي