ابتدى قلبي يحبه والسهر جاء في المنام

ابتدى قلبي يحبه والسهر جاء في المنام
من يجيه النوم أصلاً والقمر ناوي يجيه

ابتديت أحب وأحلم واللي مثلي مايلام
والله إني بالمحبه قلت هذا اللي ابيه

قبل أعرفه كان فجري لونه اشبه بالظلام
من عرفته والليالي لونها ماله شبيه

إن تكلم قال قلبي آآآه -- ياحلو الكلام
ينتهي حكيه وأنا أجلس أنتظر شيء يحكيه

إن سكت أرسل لعينه من عيوني الغرام
وأرتبك في نظرتي وألقى نفسي ذبت فيه

إن تبسم آآآآخ منه ياحلاهـ الابتسام
هو شبيه البدر لا إلا هو ماله شبيه

لمسته ياهي حنونه يلمس الطفل وينام
مره جاء يلمس يديني وضاعت أعلومي بيديه

مشيته إيقاع هادئ حاله بحال الحمام
قلبه أبيض من نهار طيبته منه وفيه

كلمته تهتز فيني كل حرف له مقام
كل جمله من كلامه تزدهر دنياي فيه

كل نظره من عيونه كنها لقلبي وسام
كل بسمه من شفاته تقهر اللي مايبيه

بس فيه برود طبع يقلب الدنيا غمام
يوم اجيه بشوق ميت وهو بروده محتويه

والله اني مااحبه وين هذاك الكلام
والله اني ماهويته يـــاااااهـ قليله اهتويه

كم سمعت الكلمه هذي ومرت مرور الكرام
ماتعبر عن غلاته ودي بشيء ابتديه

والله اني من عشقته مالقيت له أي كلام
كل لغه في الكون تعجز تبتديه وتنتهيه

بعد كل اللي ذكرته اللي مثلي هو يلام
وش اسوي القلب شافه قال ياويلي أبيه