خنجر الصمت

خنجر الصمت


كف الكلام اسمح لعيني تراعيك

واغرس بعمر السالفة خنجر الصمت

ماعدت انا اقوى بالسوليف اجاريك

تكفى تكلم بالنظر لو تكرمت

ابيك بس تناظر عيون مغليك

هذي ومن باقي مواجيبك تكرمت

اهيم لا طولت انا بالنظر فيك

وان جيت اعبر بالحكي لك تلعثمت

تكفى ترفق بي عسى الله يخليك

لأني أضيع اليا حكيت وتبسمت

العمر لحظة تنقضي بين اياديك

ياما قبل لقياك في شوفك حلمت

من يوم مادق الهوى باب مغليك

والله ما عمري دقيقة تندمت

إلا على وقت مضى قبل الاقيك

ياللي بك أحيا وأن تناسيتني مت

ودي عن عيون المخاليق أخفيك

ولايشوفك غير عين بها نمت

اسكت وخل عيون خلك تراعيك

ياليت لما أجلس معك تلزم الصمت