ثنتين بنات في جولة الرويشان

خرجت من شغلي تاعب مطنن*** وصاحبي بعدي دايم معكنن

إمشي الرصيف وحاسب الإشارة ***العقل زين والجنان خسارة

لما وصلنا الباص قمت أدعي*** اشكي إليك يارب سوء وضعي

حسّن أموري وارفع المراتب*** حتى أصل لأحسن المناصب

وصاحبي يضحك على دعائي *** لكن قلبي غاب في سمائي

و بعد الرويشان كانت الأمارة*** ثنتين بنات من حسنهن ياغارة

الأوله تضحك بصوت عالي***هز الخفوق وأسقط العوالي

عيونها تحكي لنا رواية *** هنا الجمال وأرفعوا لي راية

والثانية تلفت يسار ويمنه *** من حسنها رمى الصديق حزنه

خرج مهرول ويشق طريقه*** يا باص ارجع للورى دقيقة

شابسر أنا لفائقات الأوصاف*** واحكي لجازع كل شي بإنصاف

فقلت له : شانزل معك أناظر*** تحتاج لي وشانفعك محاور

نزلت والشارع في سكونه*** الكل يشوف ويرجفين عيونه

ما ألومهم جمالهن يجنن *** حتى الإمام لأجلهن يدندن

الأوله شافت لعيني صدفه *** قلبي ارتعش والعقل طار بخفه

بلا شعور , قلت ربي ياليت *** هذا القمر سامر عندي بالبيت

باعيش أنا في غاية السعادة *** وأكمل حياتي كلها عباده