دنــــياي

دربي طويل وتايه فيه ممشاي مثل الغريب اللي مضيع دليله

يحدني وقتي على ضيم دنياي ورضيت بالمقسوم حتى قليله

ياطول صبري وآآه ياكبر بلواي اخفي عن ا لعدوان همي واشيله

اخاف ابوح بسر قلبي وشكواي وتصير نفسي بين ربعي ذليله

اضحك وبسمتي تسكن شفاي ومن شاف حالي قال محدن مثيله

وانا بجوفي هم والنار بحشاي والجرح ينزف والليالي طويله

والعمر يمضي بي وحاير بممشاي محروم من طعم الحياة الجميله

اليأس حل وماتت اليوم رجواي ولاعاد لي غير الصبر من وسيله

يالله ياعالم بسري ونجواي تشيل عن قلبي هموم ثقيله