~( لا لي ولا لك ولا للبطاطه )~ قصص يمنيه

كيف انتو ياحاليين هاذي قصه المثل ذي بيقل~( لا لي ولا لك ولا للبطاطه )~

كان في صنعاء القديمه واحد رجال متزوج من بنت يتيمه الاب والام وكانت البنت فيها رجه شويه (لذعه ) فيوم من الايام قام خرج هذه الرجال من البيت وراح العمل

فجاء واحد رجال الي زوجته ودق الباب وهي جاوبت وقال لها


انا جيت من عند ابوش وامش هوذاكهم في الجنه وقالو تدي لهم السامن ( ادوات المطبخ ) قد معاهم بيت في الجنه


فالبنت المسكينه جمعت الادوات حق المطبخ الي داخل غراره ( وهي تشبه الكيس الكبير مصنوعه من شعر المواشي ) وقامات اعطتهن الي هذا الرجال


فلما جاء زوجها ودخل البيت جائت البنت وقالت له

قل جنه

قال جنه للمه >>>>> (ليش )

قالت قد امي وابي ارسلو لي واحد من الجنه يبز السامن لهم قد معاهم بيت في الجنه

قالها ايحينه>>>>>>>> ( متى )

قالت عادو غير خطي >>>>>>>>> ( لسته مشى الان )

فقام الرجال يلحق هذا السارق والسارق قد اخذ ادوات المطبخ فوق الخيل وهرب

والرجال جالس يلحقه بكل قوته
المهم التفت السارق الي خلفه وشاف الرجال يلحقه فقام شد شويه لين وصلو الي تحت جبل نقم

واتجه السارق الي احد الرعويين ( المزارعين ) ونزل وانزل معه السامن (ادوات المطبخ ) ودفنهم تحت التبن وكان هذا المزارع اصلع فقال السارق للمزارع

ابسر هذاك الذي بيحمل صوينا (يجري بتجاهنا ) هذك ارسله الامام يقطع راسك ويطرح فقوق صلعتك البطاط اهرب مطلع صوى الجبل .

فا المزارع خاف على نفسه وهرب الي طالع الجبل

وقتها وصل الرجال والسارق اغمض عين يقلد ان هو اعور

فسئله الرجل قاله

يا اخي ابسرت لي صاحب هذه الخيله

قاله السارق ليش

جاوبه الرجال قال

هو سارق بز السامن حق البيت وهرب

قاله هو ذاك هو اللي بيطلع الجبل الحقه


فقام الرجال لحق المزراع المسكين فلما حس المزارع ان الرجال اقترب منه

قام اخذ حجر في يده ويفدج راسه (يضرب الحجر في راسه ) لما طلع الدم

وكان يصيح

لا لي ولا لك ولا للبطاطه

لا لي ولا لك ولا للبطاطه








(((((((((((((((( اصحاب الصلعات انتبهو على صلعاتكم )))))))))))))))))))))[/