حروف في هتافي

قال ابو غاده اشجتني حروف في هتافي
والهواجس تشاركني. معاني لطيفه

انضم الشعر واتميز بسرد القوافي
لاجل احصل صدى بالتلفزه والصحيفه

افعل اعصار وغمره وقت ما الجو صافي
وركب المروح الحجري تسمع رديفه

يضهر النور بجوي وقت ما النور طافي
وانصر القوم ذي عاشت بوقتي عفيفه

كم مساكين وكم ياناس لها الطرف عافي
ذي نراها ونرجم فوقها كل جيفه

كم وكم ناس لجل العز جاوع وحافي
لجل يذكر امام القوم بسمعه نضيفه

ضاق صدره ولكنه. مباسل ووافي
ما سعي يوم حول المصلحه والوضيفه

هكذا الناس ذي تبقا لنا طب شافي
بالوفا والكرم والجود يبقى الخليفه

جانبك كلمته في حرب ولا عوافي
ما يباها ولا يعرض بكلمات مخيفه

لا بدا حرب ما يدعم لمن كان ضافي
لا ولا يحسم. القوه. ويبقى حليفه

راحته لا حضر في موت ولا زفافي
يسعد القوم حين يوصل صدا برجنيفه

ون شي مشكله دور لها حل كافي
ما يريد اسرته تمشي بكلمه سخيفه

حكمه القبيله من سار بها عاش دافي
يمشي الحق في حكمه بحكمه ضريفه

له صدى هيبته ماهو حمود الضرافي
حاكم الشرع ذي للسرق ياخذ بكيفه

لاحضر ضيف عنده ما يذبح عجافي
ما ذبح غير الاكباش الكبار والمنيفه

هكذا فصل والثاني على اهل البوافي
ذي حياته امام الظيف تضهر كشيفه

ما يشرف بساعة ضيفتي وإعتكافي
في دياره ولا يسعى لجَمل المضيفه

عادته سايبه في حسبتي وإعترافي
لن ما مسكنه في الريف ولا حل قيفه

ارتقى بالمدينه والتقاليد توافي
ون قام ياكل الوجبه يدور خفيفه

رغم ماله. تقل هذا. مسلب حرافي
لا عوزت القلص ما احتط له في سقيفه

لاكن الصدق في هذا التقاليد نافي
لازم انو ينضف من بلا السوق بليفه

ختمها بالصلاه ما الحاج بالبيت طافي
تبلغك يا النبي مول الصفات العفيفه

الشاعر محمد الجمل