يوميات مسعد ومسعدة (1) ^^

مسعد: يا مسعدة...... يييييه يامرة.... مسعدددددة

يالله رضاك بينه هذه المرة اكيد انها بتجابر بالتلفون



مسعدة: ايواا مالك يا مسعد ما تشتي للمه بتصيحوا قد سمعتوا الجيران


مسعد : ايوا الجيران سمعوا صوتي وانتي لا سمعتي بينش من اول بين اصيح ومابه حدو

مسعدة : موجودة اين عاسير مابه الا كنت بين اتحكاكى مع جارتي ام محمد


مسعد: قدنا داري ما معش غير المجابرة والقيل والقال ..والفاتورة تنخرط وانت ما يهمش هو غر مسعد عيدفع


مسعدة : ناهي ناهي ذلحين عتسمعني نفس الخبر حق كل يوم ...قل ايش تشتي وللمه بتصيح


مسعد : الله يصبرني عليش بس ..قد نسيتيني كل شيء قدنا بين اهم لو يجيء عليا يوم وقد نسيت اسمي


اسمعي يا مرة صاحبي ابو علي ورفيق عمري ابسرته اليوم وفاتحني بموضوع بنتنا بلقيس


مسعدة : مالها بلقيس ..


مسعد: ما بها الا كل خير ..غر هو جاء يخطبها لابنه علي ..قال انه قد كمل الدراسة وانه قد حصل وظيفة والحمد لله

وانتي عارفة انهم ناس طيبين وابنهم متربي ويصلي ويصوم ومافيش مثله باخلاقه ...شاب بمعنى الكلمة


مسعدة : ماهو ماهو ؟ من هو؟ انت بعقلك يا مسعد


مسعد: مالش يا مرة صلي على النبي ...مالش قلبتي وجه قلنا شاب مؤدب ومتعلم وموظف ..معاد نشتي يا مسعدة


مسعدة: مالك انت يا مسعد تشتي تزوج بنتنا لواحد مامعه الا مرتبه يكون يجيء نص الشهر ومابش معهم حق الغداء


كيف عيعيشوا ...وبعدين هذه بنتنا الوحيدة ما اشتي ازوجها اي زواجة يا مسعد ...ما ازوجها الا على اللي يقدرها ويعرف ثمنها


مسعد :: او هي بضاعة يا مسعدة قلنا اعقلي وصلي على النبي


مسعدة : عليه الصلاة والسلام ...هذه بنتي الوحيدة ومش هي ناقصة عن بنت ابو محمد ..انت عارف كيف زوجوا بنتهم وايش جابوا لها

من ذهب وكسوة وكيف كان عرسها حنان طنان كل الناس اتحاكوا عنه ...وانا بنتي مش هي اقل منها يا مسعد ...معاد ازوجها الا زواجة
احلى من زواجة بنت ابو محمد


مسعد: ماهو ماهو يا مسعدة تشتي تزوجي بنتش على واحد خليجي ما نعرفه ولا نعرف اصله وما نعرف كيف عيعمل بنتنا من بعد


مسعدة: ايش يعمل .مالها بنت ابو محمد مبسوطة ومرتاحة ما بها الا السلامة


مسعد/ عادها ما كملت الشهر يا مسعدة كيف عتحكمي عليها ...الله يستر بس كيف عتكون خاتمة الزواج هذا انا مش مرتاح من البداية


حتى قد نصحت ابو محمد لا يزوجها على رجال ما نعرف اصله وفصله لمن ما سمع خبري ..الله يتمها على خير


مسعده: ناهي يا مسعد انت بطل مخاوفك هذه ومش عيوقع الا كل خير

وبنتي مش عتتزوج من علي ومن غير جنان ...ومش عزوجها الا زواجة تتحاكى عليها امة امحمد

مسعد: يا مرة قلنا اعقلي وابسري راي بنتش بالاول ولو هي مش موافقة رفضنا قد هو براي البنت

مسعدة: ماهو يا مسعد ..الراي رايي انا وانا امها وادرى بمصلحتها وانت عارف ان بنتك طالعة

لابوها عتوافق وعتقول اهم شيء الاخلاق ومش مهم الماديات ...انا عارفة وقد شفتها بزواجة بنت ابو محمد ما كان عاجبها شيء


مسعد : هيا مادام بنتش مش هي موافقة على خبرش كان اعقلي وافهمي الخبر وبطلي الطمع يا مسعدة


مسعدة: والله يا مسعد لو ما ترفضوا الزواجة هذه وتقولوا لهم مابش معنا بنات للزواج لاسير بيت اهلي وانت عارف الباقي


مسعد: ناهي ناهي عيحكم الله عليش ويخارجنا من طمعش ( بنفسه الله يشلك انت واهلك اللي تذلينا بهم)







وبعد ايام





مسعد: يا مسعدة ...وووو مسعدة مالش يا مرة مطننة


مسعدة : ها بتحاكوني


مسعد: لا بين احاكي الجيران مالش يا مسعدة


مسعدة: مابه الا زعلانة يا مسعد وقلبي عيقرح من الزعل على بنت ابو محمد


مسعد: من هي منهن ...هن ثلاث


مسعدة الكبيرة اللي عادها اتزوجت ...مالها الا شهرين يا مسعد


مسعد: اللي اتزوجت الخليجي ...ايواااا.... وايش حصل لها


مسعدة ايوا هي قصدك اللي كانت مزوجة ...الله لا الحقه خير ...ما جاء يتزوج هو بس قضي غرض واتسلي بالاجازة حقه


قالوا رجعت بيت اهلها مطلقة


مسعد : ماهو ماهو؟ طلقها ...لا حول ولا قوة الا بالله ...هذا اللي كنت خائف منه


مسعدة : اااااه اااه لو عتزيد تعرف ايش عمل ..ايش عتقول


مسعد: ماعاد فعل اتحاكي يا مرة


مسعدة: جاب لها ذهب مغشووووش مش هو ذهب


يعني طلعت من الزواجة على الفاضي ما معها الا كسوتها اللي بتلبسها ....وياليت والله وعاد سلمت من الحمل


مسعد// ماااهو؟ حااامل !!!


لا حول ولا قوة الا بالله ...انا قلت لش يا مسعدة مش انا مرتاح للزواج هذا محد صدقني ...هيا ايش استفادوا وايش كسبوا؟

الا ما زادوا جابوا لهم محنة وجاهل يربوه


وعادش تشتي تزوجي بتنش احسن منها


مسعدة : لا خلاص يا مسعد ما ذلحين مش عازوجها الا على علي مابش احسن منه


مسعد: بعد ايش يا مسعده وقد قلتي ارد عليهم واقول لهم مابش معنا بنات


مسعدة: او قد كلمتهم يا مسعد...للمه !!


مسعد: ايش للمه وانتي قد هددتيني تسيري بيت اهلك ...


مسعدة: وانت اهبل تصدق كلما اقوله يا مسعد


مسعد: لا ماناش اهبل يا مسعدة ومن اليوم ورايح معاد اسمعش تقولي لي لا ..والا تذكري بيت اهلش ..مفهوم يا مسعدة


كلامي هو اللي عيمشي وبنتي ازوجها كيفما اشتي واللي ما يعجبه الباب سيده

مفهوم يا مسعدة


مسعدة ..مفهوم يا مسعد ولا تزعلوا انفسكم


مسعد : يالله جهزي نفسش عرس بنتش عيكون بالاجازة بعدما تكمل الامتحانات على علي

مسعدة: ماهو علي...كيف وقد رفضتوه ..او عتسير ترجعه ثانية


مسعد: ليش انا اهبل اصدق كلامش ...ما رفضته واخذت موافقة بنتش وسدينا العرس بالاجازة واعطيتهم خبر وتمينا


مسعدة وانا يا مسعد اخر من يعلم


مسعد: قلنا لما تعقلي عنكلمش ...وذلحين كلمناش او عاترفضي


مسعدة : مع مش عارفض ...لووووووووووووووول







وسلامتكم انتضرو الحلقه القادمة انشاء الله

هههههههههههههههههههههه\

روووووعه\

يناقشو قضايا المجتمع بشكل حلو ومقنع

تحيااااااااااتي لك اخي

ههههههههههههههه والله البرنامج هذا كان رهيب ^^
يسلمو الكاسر

هههههههههههه
حكايه مره حلوه
وبانتظار الحلقه القادمه
يسلمو الكاسر

شكرا لمروركم الكريم
تحياتي
alkasser

رووعه والله واللهجه اروووع ... يسلمؤؤ

شكرا على المروور

هههههههههه حلووووووو

شكرا على المرور

مناقشه جميله بين مسعد ومسعده والله انه الواقع بالضبط
مشكورين على الطرح