ياصاحبي خل العتب والمشاريه

ياصاحبي خل العتب والمشاريه = غير الوفاء بالعهد وش جاك مني

أنت السبب في كل ما صار ياهيه = ياللي قطعت الحب والود عني

معقول أبا أطلب فاقد الشي يعطيه = خل العتب ياصاحبي يستكني

مات الغلا يوم أنقطع وصل راعيه = أبطى وهو في كل ليلة يحني

غصنٍ خضر دوب أطلعت به نواميه = أصبح علاه الصبح عود متثني

واليوم جايه بالمشاريه تسقيه = تشيل صكات الليال متعني

من مات ياراع الوفاء كيف تحييه = خلّك من اللي فات لا تمتحني

لا تعتذر عذرك أنا وين أوديه = خلاص يكفيني عتاب وتجني

جرحك تراه بخافقي لا تصحيه = أقل شي خلّك على حسب ضني

ما شفت زولك يوم الايام تدميه = ياكثر ما صارعتها وصرعنّي

ارقب متى زولك يجي والتوي فيه = وأرسل مظاريف الوله ما يجني

واقول يمكن جاير الوقت منسيه = واصبر ولو صبري عليه يمني

صبرت لين الحب بانت مساويه = والعاشق الولهان قرّب يجني

ما كنت أظن ان انت بالذات تشقيه = وانا احسب اني صرت معك متهني

أخطيت في فهم الزمان وبلاويه = أثر الأماني ما تجي بالتمني

راق لي احساسها