بلا كهرب ولا بيجر ولا غازٍ ولا نقّال

الا يالله عفوك لا معي بيجر ولا جوال
ولا عندي وضيفه والتجاره فاشلٍ فيها

ولاعندي شهاداتٍ ولاحرفه تسد الحال
ولا حظٍ كبير لا اخطت الجره يقديها

مخابي الثوب تومي مادخلها من زمان ريال
بها فاتورة الكهرب ولا يمديني اقضيها

علىذيك العراوي تتعب الحادي مع الجمّال
ثلاث اشهور فالورشه وشهرينٍ مغطيها

ابيها لو تجمّل يوم واجلبها على الدلاّل
يجيها واحدٍ حظه مثل حظي ويشريها

نصيت العسكريّه يوم قالوا للنظام رجال
وقدّمت الملف وصورةٍ متشخصٍ فيها

خذا الاوراق مني واحدٍ ما عند ابوه دلال
سلوم الناس واهل المعرفه والطيب مخطيها

قراها في دقيقه والتفت عجلٍ علي وقال
شهادتك العظيمه يا ولد وين انت مخفيها

هزّيت الراس ماعندي تقول اني من البنقال
وقمت احب خشمه واطلبه بالله تمشّيها

حذفها من يده شين الطبيعه والنبا والفال
وقال ازين تعوّد صوب نوقاتك تعشّيها

تناوشته من الكرسي وعفت الحل والترحال
وضربته بالبياله عقب ما بيّحت شاهيها

خذوني للسجن لا نيب لا ظالم ولا محتال
مجرّد واحدٍ جا يكحل عيونه فيعميها

ويوم اني خرجت اقفيت لارض الله وسيع الجال
على برٍ هواه يداوي العلّه ويبريها

بلا كهرب ولا بيجر ولا غازٍ ولا نقّال
قوانين الحضاره لا تبي شوفي ولا ابيها

العراوي : سياره الونيت قديم جدا

الشاعر سعد بن جدلان افضل شاعر معاصر ان لم يكن الاول في السعوديه والخليج
مع احترامي للشعراء من شيوخ وامراء ومواطنين هاذا اسطوة الشعر
والي يحب يناقشني ويقلي فلان افضل مستعد للحوار