سكة الحزن

رجعت لسكة أحزاني أنين الشارع المهجور= على نفس الوهم أمشي يضيق الدرب باحزاني
يطل الخوف من عيني يدوّر للأمان حضور= يعانق بالندم نظرة تضيع بعبرة أشجاني
يمرني الوقت مستعجل وينسى يحتضني شعور= على حد الألم قلبي جلس والوقت عداني
نفضني كل فرح مرني على غفلة حزن مغرور= تلقّفني الزمن يضحك على يأسي وحرماني
أضم الهم واحساسي أخذني للورا مجبور= لدنيا كانت الفرحة سما والضحكة أوطاني
على ذاك الوعد جرني زمان العاشق المغدور= رمى همي على قلبٍ شعوره فارق ازماني
مشيت بدنيا المنسي مشيت وخافقي مبهور= أطالع حولي اتأمل سكون الكون بكّاني
أدوّر للقا لمحه تطيّب خاطري المكسور= أملّي بشوفها عيني وأحضنها بأجفاني
تغير كل شي بعدك تلعثم بالظلام النور= أنادي لك وأنفاسي تبعثر صرخة لساني
تمرغ بالألم وجهي وبات بها لشقا مغمور= تضيعني تعابيره وأجهل كيف تلقاني
تلبسني الحزن وأصبح رفيقي والهنا مأسور= بركنٍ أجهله بعدك وأعرف ليه ما جاني
لأني من بعد عينك شعوري طار به عصفور= رحل لابعد مدى وقفّى ولا عوّدلي من ثاني
وقلت بداخلي ترجع بنيت من الأماني قصور= وكنت أضحك على نفسي إلين الوقت صحاني
زماني غرني ضحكك تبعتك والنظر مسحور= هقيتك بالفرح تزخر صدمني فرحك الفاني
صدمني وبعدها جرني لسكة حزني المنثور= على نفس الطريق أمشي ألملم باقي أحزاني[/poem]