يوميات مواطن جوعان

السلام عليكم ورحمه الله وبركاته

مساء / صباح الخير جميعًا ..

كُل عام وأنتم بخير ،
و مبارك عليكم الشهر ..

هُـنا ..
سأقوم بـ كتابة قصيدة كل يوم خلال الشهر الفضيل

-1 -

ماتهون العشره بعيون الأصيل
حتى لو يبعد .. يرَجّعْه الأصل
وإنتْ أصيل وفوق كل هذا خليل
ليش قلبك عاش فيني وإنفصَل
الزعل طوّل .. وأنا بالي طويل
ومن غلاك القلب سامح وإتّصَل
جيت أبارك لك بهالشهر الفضيل
وأنسى غلطاتك وكل إللي حصَل
أدري بذنوبك وأدري إنّك عليل
إستغفر الله توب ويالله قوم صَل

اليوم الثاني

_ 2 _

ماشبعنا من الحياه وهي الحياه
لي متى ؟ كلٍ ورا مصالحه !
يابني آدم تفكّر بـ النجاه
وإنتْ عينك في الخطايا فالحه
جنّتك سُكّر .. وكل إللي تباه
ودنيتك مهما صفت لك مالحه
كل واحد لو عرف شنهو وراه
كان مابه في الخلايق طالحه
مايعيش الورد من غير المياه
يعني مائك كل خطوه صالحه

اليوم الثالث

-3-

مافيه قهوه سادة
سُكّر حبيبي زيادة
أحلّي فيك وأتفطّر
عساك من عوّادة

كل عام وإنتَ أحلا
وأغلا من أوّل أغلا
أهلاً حبيبي وسهلا
ياعيدي وميعادة

عادتنا في هالأيّام
نسهر وأهلنا نيّام
والحين وإحنا صيّام
بطّلنا من هالعادة

اليوم الرابع

-4-
ودّي الليله أطير
ياطير علّمني السفر
مثلك أنا ودّي أصير
عندك جناح وعندي جراح
خذني مثل من صام وراح
مشتاق للكعبه كثييير

ياطير في شهر السماح
سامحت كل إللي خطا
حياتنا أخذ وعطا
فيني خير
وأدرري مثلي فيك خير
مشتاق للكعبة كثير

لبّيك هي معنى الحياة
وعامود هالدنيا الصلاة
لامن نسيته تنهدم
ياطير أدري منصدم
عندي طلب واحد أخير
مشتاق للكعبه كثييير

اليوم الخامس

-5-
يا محمّد .. كون طيّب لايجي منْك الردى
شِب نارك دوم ، حتى لوحطب غيرك ترمّد

كل ماناديت إسمك رِد لي مثل الصدى
ما أبي تفقد شعورك موت لو قلبك تجمّد

الجروح تروح ممكن يا وليدي ماعدى :
الغدر يبقى .. لأنه فيه جروحٍ ما إتّضمّد

يا أمل ، يا فاطمه ، يا ناديه ، و ياهُدى
من بعد عيني أمانه إتبعوا سنّة " محمد "

-6-




آنا ما أصلح أحب
وإنت ماتصلح حبيب
آنا قلبي منجرح
وإنت متعوّد تغيب

واضحه هذي العلاقه
من بدايتها جروح
جيتني في وجه طيّب
وكلّها أيام وتروح

دام تاليها مبيّن
لانحب ونشتقي
الفراق الحين هيّن
من قبل لا نلتقي

-7-
إيه أحبك حب مامر البنات
ياحبيبه وأم وأكثر من إخت
فدوه لترابك جميع التضحيات
في غلاك قْلوب خلق الله زخت

المشاعر والضمير الحي مات
عين ماترضَخ مع المُدّه إرضخَت
يا لسان الحق صرنا ذكريات
وأي روح تْزورك أوّل إكشخت

إنتي فعيوني وطن من أمنيات
ضيّعوك أشخاص وضيّعنا البخت
لي متى يا غاليه؟ هذا السكات
ياكويت العز الأوضاع إمصخت