نزعت الحب

يا من نزعت الحب والقلب مرتاح

ارفق عليه من العنا لا تعنّيه

الود والاخلاص في نظرتك لاح

وبحر عيونك تجتذبني أقاصيه

الروح تفرح لاغدا وقتك افراح

واسمك يسلّي القلب لامر طاريه

والله احبك حيل والحب ذباح

في مهجتي من هو سكن غير غاليه ؟

انت الذي في داخل القلب سواح

وانت الذي من دونك الحب مابيه

لاشفت وجهك جحفل الهم ينزاح

ويرتاح قلبي من جروح ٍ بتدميه

قبلك زمان الحب دمعات واجراح

وقبلك حياتي اظلمت داخل التيه

حبك بقلبي ماتغير ولا راح

هذا الغلا والشوق بانت مواريه

رجيت انا المعبود خلاق الارواح

يبقيك رمز الحب باسمى معانيه