((( جواب توفيق الماطري = على شاعر نهم

((((بدع شاعر نهم)))

مــــرحبا بالماطري راعي الجمايل === صـــاحب الجودات تاريخة دليـلة

جيبني بإيجاز عن بعض المسائل === هـــــات شاركني قوافيـك الجميلة

ليش زاد الثـــار مــــا بين القبايل === ليش ذا يقتــــــل خويـة او زميلة

اتفـــه الاسبـــــاب نجعلها مشاكل === و التفــاهم صار حاجه مستـحيلة

كيف نسينا عرف الاجداد الاوائل === ليش بـــدلنـــا عـــوايدنـا الاصيلة

ليش صـــار العد يبداء بالتنازل === و القبيلي كــــــــل تفكيـره صميلة

ليش واسم القبيلة يعني مــراجل === من شروع القبـيلـة زرع الفضيلة

ونه اليوم اصبحت مقتول و قاتل === والدمــاء سالت كما نفط المسيلة

ويش حــــل المشكلة يا كل عاقل === ونجو اهل العرف يا شيخ القبيلة

جيبني يـــــا ماطري في رد عاجل === منتظر حلك مــــع شـرح الوسيلة

(((( جواب توفيق الماطري)))

الف حيا عد تغريد البلابل@@@ كم يعز الماطري موكب زميله

جيت شاعر نهم ارحب في تواصل @@@ القبيلي الجيد ما بانكر جميله

قلت ليش الثار دمر للقبايل @@@ ياصديق الحال. للغايه وسيله

اول الاسباب ان الجهل حاصل @@@ العقول الجاهله تعشق سبيله

والمصيبه الثانيه ان العدل فاشل @@@ دام والقاضي امامي كيف تجي له

بايصدر حكم لكن في المقابل @@@ ينقضه لو جت زلط ساعه مقيله

هكذا بيعم قانون التقاتل @@@ والخليل ياصاحبي يقتل خليله

لوتريد العدل يسري لاتجامل @@@ لاتقصر ذه ولا هذه طويله

السياب عمم ثقافات الجرامل @@@ مالهذا دخل في عرف القبيله

والتعصب طم حابلها بنابل @@@ والريا والكبر هو العله العليله

حولون القبيله تدمير شامل @@@ حسب قولك للمحاسن والفضيله

غير حكم الله ماتلقى بدائل@@@ من قتل يقتل ليتعقل زميله

بانكافح ياصديقي بانواصل @@@ للنضال من اجل ننهي كل حيله

ذا جواب الماطري في شكل عاجل@@@ جاك شاعر نهم نسناس الحليله

مع تقديري للاخ الغالي شاعر نهم


توفيق الماطري