قصيدتين ظريفتين واحدة ضد القات والثانية مؤيدة للقات

قرأت هذه الابيات الظريفة بين شاعرين وحبيت انقلها لكم طبعا مش انا دارية منهم الصدق بس القصة انه واحد ضد القات وواحد مع القات
اتمنى تعجبكم

الشاعر الاول قال :

خدرت كلمت نفسي
كم جهدي اصبح وأمسي
بالقات وشيشه وببسي
كيف الخلاص والقناعه
...................
اليوم لازم اقرر
لا قات ولا عاد اقرقر
واواتي القرش واعمر
اربع عمارات وقاعه
..................
فكرت
بعد الغدى ايش اسوي
بسرت حده الوي
فشفت حاجات تغوي
وقت صلاة الجماعه
.................
حده شوارع طويله
في البنات الجميله
واعيان سودا كحيله
جننت في ظرف ساعه
..................
حده بها ذاب قلبي
ﻷنني ولد عزبي
فخفت اجنن وجنبي
بنات نقص المناعه
...............
ليس الوي من صفاتي
وين شيشتي وين قاتي
يهون عليا مماتي
ولا الوي والصياعه
.........

والشاعر الثاني رد عليه وقال :

القات اكبر مصيبه
شعب اليمن قد بُلي به
ايش الحلول الصويبه
حتى يتم اقتلاعه

والمولعي كيف يوفر
وبطن ابنه تقرقر
وللغدا ما يدبّر
بالبيت صارت مجاعه

مافيش حق الزبادي
وعنده الامر عادي
وان مد يده لغادي
يستعطفه في براعه

يقول له: اخوك محتاج
ارجوك من غير لغاج
حق العشاء مافي احراج؟
وانه بيلوي ذراعه

وزوجته بالعناية
مرضت لقل الوقاية
تعيش تحت الوصاية
وهو يدور سعايه

القات كم هان معزوز
خلاه تايه ومدلوز
وبالثقة صار مهزوز
بالقات بدّل جياعه

وسلامتكم