الـبـالـة

هديه مني لكل مغترب خارج وداخل وطنه لم يعد هناك فرق.
مطهر علي الأرياني:

الباله والليله الباله

والليلهَ البالْ ما للنّسمَهْ السّاريهْ
هَبّتْ مِنَ الشرقْ فيها نَفْحَةَ الكاذيهْ
فيها شَذى البُنّ فيها الهَمسَهَ الحانيهْ
عَنْ ذِكرياتِ الصّبا في أرضنا الغاليهْ

(والليلهَ العيدْ وآنا منْ بلادي بَعيدْ)
ما في فؤادي لِطُوفانَ الأسى مِنْ مَزيدْ
قَلبي بوادي(بَنا) و(ابْيَنْ)ووادي(زَبيدْ)
هايمْ ..وجسمي أسيرَ الغُربَهَ القاسيهْ

خَرَجت انا مِنْ بلادي في زمانَ(الفنا)
أيّامْ ما مَوسِمَ الطاعونْ-قالوا-دَنا
وِماتوا اهْلي ومِنْ حَظّ النّكَدْ عِشتَ انا
عِشتَ ازْرَعَ الأرضْ واحْصِدْ روحيَ الّذّويهْ

ذَكَرتَ اخي كانْ تاجرْ أينما جا فَرَشْ
جَواْ (عَسْكَرَ الجنّ)شَلّوا ما مِعِهْ مِنْ بُقشْ
بَكّرْ غَبَشْ أينْ رايحْ؟ قال: أرضَ الحَبَشْ
وسارْ واليومْ -قالوا-حالَتِهْ ناهيِهْ

بَكّرْتْ مِثْلِهْ مِسافِرْ والظّفَرْ بالبُكَرْ
وكانْ زادي مع- الّلقْمَهْ- ريالَينْ حَجَرْ
وابحَرتْ في ساعِيهْ تِحْمِلْ جلودَ البَقَرْ
والبُنّ للتاجرَ المَحظوظْ والطاغيهْ

بَحَثْتْ عَنْ شُغلْ في الدكّهْ وداخلْ(عَصَبْ)
وفي الطّرُقْ والمَباني ما وَجَدْتَ الطّلبْ
شَكَيتْ لاخْوانيَ البَلوى وطولَ التّعَبْ
فقالوا : البحْرْ... قُلتَ : البَحْرْ وا ساعِيهْ

وِعِشتْ في البَحْرْ عامِلْ خَمْسْتَعْشَرْ سَنَهْ
في مَرْكبَ(اجْريكيَ)اعْوَرْ حَازِقَ الكَبْتَنَهْ
وِسَوَّدَ الفَحْمْ جلْدي مِثْلِما المَدْخَنَهْ
وطُفْتْ كَمْ يا (بلَوّدْ)أرضها قاصِيهْ

مِثلَ الطُيورَ القَواطِعْ طُفْتْ كُلّ الجُزُرْ
غَوَيتْ لي ما غَوَيتْ لَوما كِرِهْتَ السّفَرْ
واخْتَرتْ بَرّ(الدّناكِلْ) مُتَّجرْ بالحِصَرْ
مِنْ حَيّ لا حَيّ يا مَركَبْ بلا ساريهْ

غَريبْ في الشاطيَ الغَربيْ بجسْمِهْ نَزَلْ
والرّوحْ في الشاطيَ الشّرقي وِقَلبهْ رَحَلْ
يالَيتْ والبَحْرَ الاحْمَرْ ضاقْ ولاّ وَصَلْ
جُسورْ تِمْتَدّ عَبْرَ الضِفّهَ الثانيهْ

مَنْ كانْ مِثلي غَريبَ الدارْ مالِهْ مَقَرْ
فَما عَلَيهْ إنْ بَكى وابْكى الحَجَرْ والشّجَرْ
إبكيْ لَكَ ابْكي وِصُبَّ الدّمْعْ مِثلَ المَطَرْ
وِمِنْ دَمِ القلبْ خَلّي دَمعَتَكْ جاريهْ

غَنّيتْ في غُربَتي(يالله لا هِنْتَنا)
وِمَزّقَ الشّوقْ روحي في لَهيبَ الضّنَى
راجعْ أنا يا بلادي يا بلادَ الهَنا
يا جَنّتيْ يا مَلاذيْ يامّيَ الغاليهْ