********قصيدة هيبة ملك**********

وينك انته ووين غيرك نلت في قلبي الصدارة
همْ ثرى وانته الثريا فوق ما حد يوصله
انته لي أكبر طموحي شوق قلبي واختياره
وانته لي بسمة حياتي في الليالي الممحلة
لك خضع قلبٍ تمرد ما عرف معنى الخسارة
لان واستسلم وسلّم والعيون تخايله
غير ما جاك بكلافة جاك من دون استخارة
والتقاك بعين عاشق كلها شوق ووله
ما تبعهم في هواهم أو تردد في قراره
يحسم الموقف فلحظة والجوارح ماثلة
لين ما بدّاك عنهم صرت جاره ومستشاره
هذا هو مفتاح قلبي في يدينك واقفله
ألتزم بك مثل نجمٍ ما تقاصر عن مداره
أو كما سير المجدّي في دروب القافلة
يا مزيجٍ من تواضع وارتقى حد الجسارة
يا رقم صعبٍ عصاهم غير عندي ما اسهله
أعشق الخطوة المهيبة..قبلتك والإستدارة
هيبتك هيبة ملوكٍ واعتدالك عاد له
واعشق الصمت فحضورك لو ورا صمتك إثارة
وان كسرت الصمت لحظة أذهلتني الأسئلة
واعشق الليل وخيوله في صعوده وانحداره
واعشق النظرة الخجولة والرموش مظللة
هذا هو قلبي واحيده ما يبي غير الصدارة
لو طلب نجم الثريا أشهد انه يوصله .

للشاعر : سعيد الفطيسي
(تحياتي)