$$ فـــــــــــز الخفــــــــــوق$$

فز الخفوق وقلت يالله عسى خير

أثر الليالي عاد غايب قمرها

مع شوفته نشوه وفزه وتخدير

وعيون خلان تعانق نظرها

يفزله قلبي كما فزة الطير

والرجل كن اللي تحتها غدرها

ياصبح عمري ياصباح التباشير

نوره ملا قلبي وروحي غمرها

عقب الفراق اللي تعدى المحاذير

يبس غصون القلب جافي دهرها

ربع بروحي عقب ماهي معاسير

سحابة هلــت بقلبي مطـــرها

واسقى بها زرعة هوانا بتقدير

غرسة غرام بالمحبه بذرها

ياعاذلين العين والله مخاسير

واللي درى عن حال عيني عذرها

تشوم عيني عن جميع الغنادير

وان ناظرت عيني فؤادي نهرها

ياناس احبه والمحبه مقادير

هذا هوى نفسي وهذا قدرها

والحب ماله يااهل الحب تفسير

قلبين والله بالمحبه امرها

لي جيت اصور حالة الحب تصوير

وارد عن حالي لخـــلي خبـــــــــرها

لقــيت وجـدي فــوق كــل التعابـــير

كل الشعــــر قطره وشـــوقـــي بحرهـا..

******** ********* ******

اتمنى ان تنال اعجابكم خاطرتي هذي...

مع حبـــــــي,,,,
أحلــــــــــى ســــــــــــاره....