نكمل معكم اعزائي الاعضاء قصة ابطالنا ..


الجزء الرابع ...



ملكة اليمن : يووووه ياجماعه جو ابسرووو ماهوو هانااا؟؟



صقريماني : مال امش ياملكه ايش قد حصلتي فجعتيني قدني مفتجع منش ماعاد تتكلمي بشي الا به شي مصيبه



القائد في الظل: اصه اسكت خلنا نشوف مالقته البنيه




ملكة اليمن : ابسرو الاسلحه الي لقيتها ..اسلحه مدري ايش قد يشتو يعملو بها .؟



الفهد: ياسلااام الله رزقني بالسلاح الي اشتيه من زمان .بين اقول انه جيتي هانا ماهي ببلاش




القائد في الظل /: ماهو هذا الكلام يافهد ايش جينا نعمل هانا او جبناك تتمشى وتزبج بالاسلحه




الفهد: عليا الحرام والطلاق اني جيت معكم من شان ننصح الناس الي يغررو بهم ..مالك ياقائد انا بين امزح معك لا تقلبها جدا والا الصميل موجود



ملكة اليمن : خلاص اسكتوو كم فيكم من هدره لو سرت لي عند اختي هيا تعمل لي قهوة كان ابرك لي




شلال دموع : شلوني لو جلست لي بالبيت احسن لي من هدرتكم الي توجع الراس




رقة ورده: غبني عليكم قد نسيتوو للمه احنا هانا كنكم بديتوو تتكسلو




القائد في الظل : لا والله اني على ما انا ماتغيرت لا تقلقي




اليمن اغلى : والله اذا ماسكتو وخليتوناا نكمل المهمه والا بحضر ابتكم كلكم من الموقع مشتي كسل وتذمر هيا ماهوو والا شفت اعضاء ثانيين يكملو معناا




ملكة اليمن : اخيراا تحاكيت يافندم لاتنسى انا اداريه وشحضرك انا (والمزاح كان سيد الموقف بهذه اللحضه )



صقر يماني : ياجماعه ايش نعمل بالاسلحه لانهاا خيرااات ماشانقدر نحملهاا كلهاا ؟؟



نسمه يمانيه : ياهل علمي ايش كانو يشتوو بهالاسلحه ياجماعه؟؟



القائد في الظل :الي اعتقده انهم اناس يحاولو يوزعو الاسلحه بالاشخاص المغرر بهم .. ويوهموهم بالاكاذيب الملفقه يعني مثل الي نشوفه بالتلفاز بالزبط



ملكة اليمن : اهاااا وانا بين اقوول انه الاسلحه الي تكون حق الحكومه ماتنطرح هاناا بمثل هالبيوت المدقدقه




الفهد: صحيح ياجماعه هولاااا ماهن الا اسلحه للخراب والدمار بيننا اليمنين وفتنه




القائد في الظل : ايوه هو هكذااا




صقر يماني : طيب وش الحل بالاسلحه ياخبره




اليمن اغلى : مارايكم نحرقهاا ؟؟



ملكه اليمن : فكرره حاااليه ليكن يمكن مايحترقين ؟"



صقر يماني : الا بيحترقين وماعاد بيكون لهن أي منفعه يابنيه




القائد في الظل : طيب نحرق ابتهن ونهرب من هانا لا من سمع ولا من دري تمااااااام




رقه ورده وشلال : نااهي موافقين على بركة الله




ملكة اليمن : يلا يااشبااب انا شاشل البناوت ونخرج لاخر الحاره وانتو ولعو النار على البيت بكله وركزوو على الاسلحه ونحن بالانتظار من شاان نروح لصنعاء ماعاد نقدر

نكون هانا بالقريه اليوم ناهي ؟؟



صقر يماني : يلااا توكلين على الله ياخوات وباذن الله ماشانتأخر

وبينما ملكه وشلال ورقه ونسمه خارجات من اخر القريه وقع الذي لم يكن بالحسبان!!!

نسمه يمانيه : يابنات مدري مالي قلقانه هكذا

ملكة اليمن : مالش يابنيه اخزي الشيطان لا توسوسي وتقلقيني معش

رقة تهمس لشلال : شووفي على صحبه كيف هن يخافين على بعض وانا وانتي ماتسال علينا هالجنيه ملكه شي؟!!!

شلال دموع : لا تقولي هكذا مالش .. ملكه طيبه وخبلاا ماتقصد انها ماتسال علينا لانها عارفه ان احنا كبار محنااش صغار يارقه

رقة ورده : ولو ياذكيه لازم تحسسنا مثل ماتحسس نسمه والله انو قهر

شلاال دموع /خلاااص اهجعي من الحساسيه الزايده

وفجأة

ظهر مجموعة من الشباب ويرمون بالكلام الغزلي

ملكة اليمن: هياا ماتشتو ياجن

الشباب : مالش هكذا جايه تضاربي او شفتي وحوش

شلال دموع : انتو ماتخافو الله وماتخافو على اعراضكم ومكالفكم

نسمه يمانيه : اصه ادولي صميل اشتي اخجع راس هذا الي مسوي نفسه مهنجم ساع الطلي

رقة ورده: يوه يوه يوه والله اني خايفه

ملكه اليمن : منيش تخافي من هولاا عني والله مايجزمو غير الكلام بس والا والله ماشيقع لهم شي طيب

شلال دموع : قال النبي محمد صلى الله عليه وسلم :
(إنما النساء شقائق الرجال، ما أكرمهن إلا كريم، وما أهانهن إلا لئيم) فلا تكونو لئيمين معنا من كلامكم هذا ياخبره .. احناا خواتكم وامهاتكم وبناتكم وماترضوهاا على اهل بيتكم مـــــه ؟؟؟

الشباب : اسفين ياخوات الي مايعرفكن يجهلكن لانه به بنات هانا يضحكين وياخذين الامور بسهاله وقلنا انكن مثلهن

ملكة اليمن :قال النبي محمد صلى الله عليه وسلم :
( الدنيا متاع وخير متاعها المرأة الصالحة ) ولله الحمد احناا بنات نعرف الصح والغلط والي حاشمه نفسها تنعرف والي تشتي خباله وكلام من حق الجن تنعرف

الشباب : نكرر اسفنا الله معكن

ملكة اليمن : شفتين يابنات كيف بالكلمه الطيبه وتذكيرهم بالله كيف خافوو وماجزمو يغلطو بشي

شلال دموع فعلا ياملكه حرااام انش صاادقه

رقة ورده : يابنات كنت اشتي اشل الحجرة وارميها براسه

نسمه يمانيه : اصه لحد يسمعش لا تتكلمي قد ابسرناا مافعلتي

شلال دموع : به جاهل يبكي هناك يابنات تعالين نبسر ماله

البنات : ناهي يلااا خلينا نشووف ايش به

ملكة اليمن : مالك يابني ايش فيك قاعد لحالك وتبكي وينها امك تركتك هانا شلوهاا

الطفل : امي ماناش داري فين هي خلتني هانا وماعاد جت

شلال دموع : ياجمااااااعه ياجمااعه ابن من هو هذا اين هم اهله جوو ابسرووه حرام عليييكم والله

(تجمعوا هل المنطقه كلهم لنداء صوت شلال دموع وبعدها تقدم رجل اليهم وقال ..



الرجل : هذه امه مع المتظاهرين الي بصنعاء يابناوت قد لهاا يومين هناك

شلال دموع : يووه وتركت ولدها هانا ايش من ام هذه

ملكة اليمن: ياجلي جلاه او امه توكل كرمان ((ههههه)

نسمه يمانيه : لا شلوووش هذا الوليد اشهب مليح مش مثلها

شلال دموع : خلااص يانسمه لازم تتضحكي على الناس لا عاد اسمع لش نخس

نسمه يمانيه: مالش او قلت شي غلط اييييوه هو مايشبه توكل حراام انها ماتشبهه بظفر هذا المليح

ملكة اليمن : ناهي ناهي فهمنا مش وقتكن الان ..

شلال دموع: مارايكن نشل الوليد تيه معنا

الرجل : لا يابنت الحلال خليه عندي يجلس مع عيالي وان شااء الله ماشاقصر معه

ملكة اليمن : بارك الله فيك ياخي ونعم الرجال هكذا هم ابناء اليمن اصحاب الاخلاق الطيبه والرحيمين .. وبللغ ام الولد يوم تحصلها هالكلام وامانه بعنقك توصلها

سئل النبي محمد صلى الله عليه وسلم عن خير النساء فقال:
( التي تطيع إذا أمر , وتسر إذا نظر , وتحفظه في نفسها وماله ) رواه احمد والحاكم..

الرجل : مايهمش ان شاااء الله شقلها لانه كل نسوان الحاره ضد تصرفها هذا وعلى الله تعقل وترجع لرشدها

(وفجاة دوا صوت انفجار من البيت الذي كان به الشباب )

ملكة اليمن : يااااااااااو ايش هالانفجار يابنات

شلال دموع : اناا كنت مفكره عيحرقو البيت بس حرق

نسمه يمانيه: قد كان قلبي شاااك يابنات انه بيقع حاجه

رقة ورده : اسألكن بالله نسير نشووف ايش وقع لهم

ملكة اليمن : لاكن هم قالو لنا اسبقين من شاان محد يدري بنا

شلال دموع : مارأيش نسير لمسؤل القريه شرف الدين فاضل نخليه يشوف ايش وقع بهم ؟؟

ملكة اليمن /: يمكن يزعلو يوم يعرفو ان احنا سرنا وقلنا لناس ثانيين

شلال دموع : لالا هو متضامن معنا مابيفسد علينا وبعدين احنا ماعملنا الا الشي الصح

ملكة اليمن : لا لا لالا .. شانسير نشووفهم احنا من بعيد لابعيد

رقة ورده : ايوة لازم نسير نشووف الوضع لانه الانفجار هذا مش بسيط هذا انفجار يفجر الراس والله

(حينها ذهبت البنات للمكان الذي كانو به الشباب )



اليمن اغلى : ياجماعه انفجرت قنبلة بداخل البيت بالغرفه الي شق الغرفه الي بها اسلحه

(وكان اليمن اغلى ملطخ بالدم والاصاابات بيده ووجهه )

ملكة اليمن : ويييييين البقيه يايمن اغلى اين هم ايش حصل معهم

شلال دموع : تحاكى لا تسكت مالك ساكت

اليمن اغلى : انا كنت بين افتح الصناديق الي بالغرفه الثانيه .. وبعدااا لقيت شنطه صغيره كنت اشتي افتحها ماقدرت وبعدا شليتها ورجمتها من الطاقة والا وهيه انفجرت قوووووي ومادريت بنفسي الا وانا خارج المكان هذا والباقيين مدري ايش حصل لهم ..

ملكة اليمن : ياجماعه ساعدوو الشباب الي بالداخل فيسع

شلال دموع : انا شتصل للامن الان

اليمن اغلى : الله يشلني انا السبب انا ماشي مني فايده انا من خليتهم يتعذبو

ملكة اليمن :جبرك بامك اسكت اسكت مش وقتك الان خلنا نتطمن عالباقيين وانت لا تقلق هذا مقدر من الله

نسمه يمانيه : ياملكة الدخان بدأ يخف من المكان ياخوفي صاار بهم شي ..

(وتجمعوو اهل المنطقه جميعهم لمساعدتهم وينظرو مالذي يمكن ان يحدث معهم ..؟؟؟





















ترقبو الجزء الخامس ....

شي طيب وتسلسل رهيب في القصه بس وين الجزء الثالث مسرع نبعتي الى الجزء الرابع !!
اتمنى لك التوفيق والنجاح