منتديات اليمن أغلى YEMEN FORUMS - ادخل رشح -----============------------------------

القصيدة بعنوان
اليمن بين لصوص الثروه ولصوص الثوره

. أقول الحمدلله المغيث المنجد الأعظم
منجّي يونس وقد كان في بطن الدجى مغموم
واخرج يوسف الصدّيق من أقصى عميق الهَمّ
وخارَج في الرُّبى موسى بفضله من حبال القوم
واثنّي بالصلاه عاللي بذكره يستطيب الفم
ذي قال له ذراع اللحم ياطه أنا مسموم
محمد سيّد الدنياحبيبي المصطفى الأعظم
صلاة الله عليه من يومنا حتى القيامه تقوم
وبعده باأسوق الشعر وبحوره وأتكلم
عشان احكي على شعب اليمن ذي في الدجى مهموم
يوم احنا خرجنامن حرمنا الجامعي نزحم
كأمثال الأسود اللي تحس ان الحتوف تحوم
وقلنا بس يكفينا شربنا المُرّ والعلقم
وجاءت لحظة الثوره وصار القلب بالبلعوم
شبعنا جوع من جور الفساد وهو ولا يرحم
ولا في حضرته ياناس قد شفنا أحد مرحوم
وفجأه جاء خبر عاجل يفيد انّ الفساد انضم
وقال عايحرس الثوره وحول اكنافها عايقوم
وقام اخواننا في الله أفتو ان الفساد اسلم
وصارت كل أمواله ودمّه يا نظر معصوم
لحق من بعده ابن الشيخ ذي كم قد سجَن واعدم
والله وصار حاميها حراميها وانا المكضوم
منهو اللي نهب أرضي واموالي معه مغنم
وعاد كرشه الى حلقه من اموال الوطن متخوم
منو أصل الفساد اللي قد احنا منه للبلغم
منو اللي شلّ حق الشعب وخلّى الشعب ياكل دوم
على من قامت الثوره؟أمانه ردّ واتكلم
ولا تبقى معه واهم أمانه لا تكون موهوم
واحنا جالسين العمر لاجل صعودهم سلّم
وليت والله عايبذر بهم معروف أطرَف يوم
أحمر عندنا يحكم واحمر فيك يتحكم
كل الناس فهموها وانت مكانتك بتعوم
قالو لاجل ثورتنا فلابد ظهر أو معصم
لاجل توقف على ارجلها فلابد نقبل المذموم
معادوش هذك السارق خلاص قد هو بطل ملهم
وقدهو الثائر الطائر وفي صف الوطن مضموم
على من تضحكو بالله تظنو الشعب اصم ابكم
وانه بايصدقكم كأنه ما معه مفهوم
من اي حين كانت الثوره ولابد قبلها مَحرَم
ولو حتى قطيع ذياب مايمكن تخيف القوم
تحط الملح فوق الجرح وتقول ياغبي بلسم
قصدك لا اللبن أبيض ولو هو منتهي ومسموم
باقي الا الرئيس وابنه بس وان الفِلِم قد تم
ديمه بابها اتغير وردّ اللوح ألمنيوم
على من قامت الثوره؟على هايل سعيد انعم
على البترول والمازوت والديزل00قدو معدوم
على ذاك الرصيف اللي لِكَم مسكين صدره ضم
على المسكين ذي قد هو من ابسط حق له محروم
على الأشجار ذي بالحُسن والخضره بتترنم
على الاطفال ذي سهرو ولا قدرو يذوقو النوم
وحتى الكهربا من ضربكم تبكي وتتألم
واحنا بالظلام نفطر وفي وسطه عقدنا الصوم
اين مدنية الدوله وقد هو الشيخ يتزعم
وايش من عدل يا خُبره بمكيالين جا مدعوم
لو انت بزمرة الإخوان فيعني انك الأقدم
واذا انت من الشباب الحُر فعادك بالأخير مرجوم
وايش من سلميه ياناس؟ وقد هي ملطخه بالدم
وين دور الشباب اللي عايش في وسط بدروم
إذا هذا تقدمكم معادنشتيش نتقدم
واذا هذا الغد الأفضل فيارب خلنا في اليوم
خلاص شعبي حلف بالله يمين ما عاد يزيد يحلم
خلاص شعبي قدو راضي يعيش طول الزمن مظلوم
خلاص يا مشتَرَك يكفي 00فقد شعبي حلف واقسم
وحتى الآن وهو صابر00وعاده مارضيش يقوم .